ខេត្តកំពង់ឆ្នាំង៖ ស្ដ្រីកូនខ្ចីវ័យក្មេងរូបស្រស់ម្នាក់ត្រូវបានជនមិនស្គាល់មុខអាកសម្លាប់ចោលនៅក្នុងព្រៃត្រែងយ៉ាងអាណោចអាធ័ម ដោយបន្សល់ទុកនូវកូនតូចម្នាក់ដែលមានអាយុ៦ខែអោយដេកយំម្នាក់ឯងយ៉ាងកំសត់។ ហេតុការណ៍នេះបង្ករអោយមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋដែលរស់នៅភូមិក្បាលកន្លង់ ឃុំពាមឆ្កោក ស្រុកជលគិរី ខេត្តកំពង់ឆ្នាំង។
ប្រភពពីប្រជាពលរដ្ឋបានអោយដឹងថា ដំបូងឡើយក្រុមគ្រួសារបានឃើញទារកអាយុ៦ខែ យំនៅលើផ្ទះម្នាក់ឯង បន្ទាប់មកឪពុកជនរងគ្រោះ នាំសាច់ញាតិក្នុងភូមិដើររករហូតដល់ម៉ោង៧យប់ ទើបឃើញសពជនរងគ្រោះដេកស្លាប់ក្នុងព្រៃត្រែងបន្លាយួន ក្នុងដីរបស់ឈ្មោះ ហុន ហេ ស្ថិតក្នុងភូមិឃុំខាងលើ ចម្ងាយពីផ្លូវប្រមាណ២៥ម៉ែត្រ។ បន្ទាប់មកក៍បានរាយការណ៍ជូនមន្ត្រីសមត្ថកិច្ច ហើយមន្ត្រីសមត្ថកិច្ចក៍បានចុះមកទីតាំងកើតហេតុដើម្បីពិនិត្យ។
ក្រោយពេលមន្ត្រីសមត្ថកិច្ចធ្វើការត្រួតពិនិត្យរួច ឃើញថាជនរងគ្រោះមានសភាព ខោស្រាតត្រឹមភ្លៅនៅលើដើមកមានស្លាកស្នាមមុតជិតដាច់បំពង់ក និងបាត់ គ្រឿងអលង្កាមាសជាប់នឹងខ្លួនមួយចំនួនទៀត។ បច្ចុប្បន្នមន្ត្រីសមត្ថកិច្ចកំពុងព្យាយាមតាមស្វែងរក និងចាប់ខ្លួនជនដៃដលយកមកផ្តន្ទាទោសតាមផ្លូវច្បាប់ ចំណែកសាកសពត្រូវបានក្រុមគ្រួសារសាច់ញាតិយកទៅធ្វើបុណ្យតាមប្រពៃណី។
