រាជធានីភ្នំពេញ ៖ ស្ត្រីម្នាក់ចាញ់បោកការលួងលោមរបស់បុរសម្នាក់ដែលស្គាល់គ្នាតាមរយៈហ្វេសប៊ុក អស់ កាបូបលុយ និងទូរស័ព្ទសាំសុងមួយគ្រឿង បង្កឲ្យមានការភ្ញាក់ផ្អើលកាលពីវេលាម៉ោង០៨យប់ ថ្ងៃទី១១ ខែមិថុនា ឆ្នាំ២០១៧ ស្ថិតនៅភូមិចាក់ជ្រូក សង្កាត់សំរោងក្រោម ខណ្ឌពោធិសែនជ័យ ។
ជនរងគ្រោះមានឈ្មោះ ម៉ៅ ម៉ារី ភេទស្រី អាយុ២៥ឆ្នាំ មុខរបរកម្មការិនីរោងចក្រ ស្នាក់នៅផ្ទះជួលភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ មានភូមិកំណើតនៅភូមិព្រៃចំបក់ ឃុំឈើទាល ស្រុកស្វាយជ្រំ ខេត្តស្វាយរៀង ។ ចំណែកជនបង្កស្គាល់គ្នាតាមរយៈហ្វេសប៊ុក ។ តាមប្រភពព័ត៌មានពីកន្លែងកើតហេតុបាននិយាយថា មុនពេលកើតហេតុ គេបានឃើញស្ត្រីរងគ្រោះដើរក្នុងភូមិកើតហេតុតែម្នាក់ឯងដោយមានសភាពមិនប្រក្រតី យកដៃផ្ទប់មុខមានរបួសជាំក្រហមពេញមុខ ។
បន្ទាប់មកប្រជាពលរដ្ឋបានសួរនាំស្ត្រីខាងលើនិយាយថា ខ្លួនត្រូវគេដាក់ថ្នាំយកកាបូបលុយ និងទូរស័ព្ទបាត់ហើយ ប៉ុន្តែពេលសួរនាំអ្វីៗផ្សេងទៀតមិនប្រាប់ទេ ម្តងប្រាប់ថាជិះម៉ូតូមក ម្តងថាជិះជាមួយគេ ។ ដោយសារឃើញសភាពនមិនសូវស្រួល ប្រជាពលរដ្ឋនៅបានវាយខ្ទឹមសឲ្យគាត់ហិតព្រោះខ្លាចត្រូវគេដាក់ថ្នាំ លុះមួយសន្ទុះក្រោយមកទើបប្តឹងទៅសមត្ថកិច្ចឲ្យមកជួយអន្តរាគមន៍ ។
តាមប្រភពពីលោកនាយប៉ុសិ៍សង្កាត់សំរោងបាននិយាយថា ស្ត្រីរងគ្រោះខាងលើមិនមែនត្រូវថ្នាំគេទេ គឺសង្ស័យចាញ់ការលួងលោមរបស់បុរសម្នាក់យកកាបូប និងទូរស័ព្ទទៅអស់ ព្រោះស្ត្រីរងគ្រោះបានប្រាប់លេខទូរស័ព្ទរបស់ក្រុមគ្រួសារដែរ តែទាក់ទងពុំចូល ត្រូវលោកនាយប៉ុសិ៍បាននាំជនរងគ្រោះទៅផ្ទះជួលតែម្តង ។ ខណៈពេលនាំជនរងគ្រោះទៅដល់ផ្ទះជួលម្ចាស់ផ្ទះហើយសួរនាំបានដឹងថា ស្ត្រីរងគ្រោះជាមនុស្សមានប្តី និងមានកូនម្នាក់ អាយុជិត២ខួបទៅហើយ ប៉ុន្តែស្ត្រីខាងលើបានទាក់ទងតាមរយៈហ្វេសប៊ុកជាមួយជនបង្ក និងបានឆាតតាមហ្វេសប៊ុកណាត់ជួបគ្នា ។
បើតាមប្រភពពីប្អូនស្រីរបស់ស្ត្រីរងគ្រោះមានឈ្មោះ ម៉ៅ ស្រីណុច បាននិយាយថា នៅពេលថ្ងៃរសៀលម៉ោង០៤ ថ្ងៃដដែល បងស្រីរបស់គាត់គឺមានមិត្តប្រុសម្នាក់ដែលស្គាល់តាមហ្វេសប៊ុក ដែលទើបនឹងស្គាល់គ្នាតាមឆាត ហើយបបួលបងស្រីនាងទៅហូបស្រាក្លែមសាច់ក្រកនៅកំបូល ផ្លូវជាតិលេខ៤ ដោយរូបគាត់បានជិះម៉ូតូមួយគ្រឿងឌុបបងស្រីទៅជួបគ្នា រួចហើយបាននាំគ្នាផឹកស្រាក្លែមសាច់ក្រក ។ លុះពេលផឹកស៊ីបានបន្តិចរូចគាត់បានបបួលបងស្រីរបស់ខ្លួនត្រលប់មកផ្ទះវិញ តែបងស្រីប្រាប់ថា ចាំកន្លះម៉ោងទៀតពួកគាត់នឹងទៅវិញហើយ ទើបរូបគាត់បានជិះម៉ូតូត្រលប់ទៅផ្ទះមុន នៅសល់តែបងស្រី និងបុរសដែលស្គាល់គ្នាតាមហ្វេសប៊ុកនោះ នៅផឹកស៊ីបន្តទៀត ។
ប្រភពដដែលបន្តទៀតថា រហូតដល់ម៉ោងកើតហេតុខាងលើ ទើបឃើញបងស្រីដើរមកវិញទាំងសភាពដូចត្រូវថ្នាំ ទើបសមត្ថកិច្ចសង្ស័យថាជនរងគ្រោះចាញ់បោកការលួងលោមរបស់ជនល្មើសអស់កាបូប និងទូរស័ព្ទដៃសាំសុងមួយគ្រឿង ។ ក្រោយពេលកើតហេតុសមត្ថកិច្ចបានសាកសួររួចរាល់ ហើយឲ្យនារីរងគ្រោះខាងលើ រងចាំព្រឹកស្អែកចាំស្វាងស្រាចាំទៅដាក់ពាក្យបណ្តឹង នៅប៉ុសិ៍សំរោងក្រោម ។